GOBERNAR OBEDECENDO. CÓDIGO DE ÉTICA POLÍTICA.
Este documento
recolle un código de prácticas que as
persoas que ocupen cargos electos e de libre designación deberán cumprir
para tentar acadar unha xestión política comprometida e próxima á cidadanía,
con mecanismos eficaces de transparencia no financiamento e rendición de
contas, democráticos e populares, e con espazos reais de participación e
decisión da cidadanía nos asuntos públicos.
Tamén se
expoñen diversos compromisos e medidas que teñen como obxectivo garantir que
todos poidan dedicar o tempo necesario á xestión política e ás funcións
públicas e, ao mesmo tempo, rematar cos privilexios dos que, durante moitos
anos, gozou boa parte da clase política e que foron unhas das causas que provocaron
un grave afastamento dos intereses da cidadanía.
Este compromiso de ética política parte da
confianza e o compromiso que esta candidatura mantén coas persoas que ocuparán
un cargo de responsabilidade pública, ademais de significar un mecanismo de
apoio, supervisión e control á súa tarefa.
As persoas que
ocupen cargos públicos baixo o mandato deste código de ética política,
comprométense tamén a impulsar os instrumentos e mecanismos legais necesarios
para que estes principios éticos convértanse en norma obrigatoria para todos na
administración municipal.
Este código ético quere ser flexible, dinámico e
conciso. A candidatura traballará nun regulamento que concrete e faga
operativos os principios do código ético.
Os principios
recollidos neste código ético comprometen a todas as persoas da candidatura que
ocupen cargos electos, de libre designación e xerenciais, tanto do Concello de Ferrol
como noutras institucións—públicas e semipúblicas— onde o Concello ten
participación financeira ou de control, e nos espazos de toma de
decisións.
Todas estas
persoas comprométense a:
Defender a
aplicación da Declaración Universal dos Dereitos Humanos nos ámbitos social,
político e institucional da nosa sociedade.
1. Democratización da representación política,
fiscalización e rendición de contas
1.1. Defender o establecido no programa político
da candidatura e actuar como representantes, obrigados a seguir as decisións
tomadas nos mecanismos democráticos e abertos a toda a poboación que fixe a
candidatura, promovendo a corresponsabilidade política de todos e todas.
1.2. Facer públicas as axendas dos representates,
para facer visible con quen se reúnen e os temas que se tratan. Faranse
públicos tamén as ordes do día e as actas das reunións.
1.3. Facilitar todos os ingresos, bens e
rendementos patrimoniais dos representantes, así como todos aqueles datos
necesarios para a detección de posibles conflitos de intereses e a elaboración
de auditorías cidadás. Este compromiso estenderase aos 3 anos seguintes á súa
saída da función pública.
1.4. Facer públicos os criterios de contratación
dos cargos de libre designación.
1.5. Render contas das súas actuacións ante a
cidadanía, mediante instrumentos presenciais e virtuais, asemblearios,
democráticos e abertos a todos de ámbito sectorial ou de zona (cidade, barrio
ou distrito). A información presentarase sempre nun formato open data que
permita traballala.
1.6. Aceptar a censura (e revogación, no seu
caso) de concelleiros/as e cargos de libre designación por mala xestión ou por
incumprimento flagrante e non xustificado do programa. Para que isto sexa
posible, estableceranse mecanismos de garantía e avaliación da xestión das
persoas con cargos públicos da candidatura, e a cidadanía terá o dereito e o
deber de participar activamente no control e seguimento do labor dos cargos
públicos para garantir unha correcta e honesta aplicación deste
principio. Así, da asemblea soberana emanaría un mandato imperativo que os seus
representantes ou, no caso de ser
elexidos pola cidadanía, os concelleiros/as
deberán cumprir e en caso de que non
sexa así as consecuencias serían que a asemblea podería deslexitimar, pola maioría
que se decida no regulamento que desenvolva o funcinamento da propia asemblea, aos
seus representantes nas institucións. Neste caso, os ditos representates deberían
proceder a entregar a súa acta a outro/a membro proposto pola
asemblea e que aceptase o cargo.
1.7. Non acceder durante un período, mínimo de 5
anos, a cargos de responsabilidade en empresas creadas, reguladas,
supervisadas, ou que fosen beneficiarias dun contrato municipal, dentro do
ámbito e/ou sector onde desenvolveu a súa función representativa. En ningún
caso ocuparanse cargos nos consellos de administración destas.
1.8. Manter un contacto habitual con colectivos en
situación de vulnerabilidade, garantir o espazo necesario nas súas axendas para
atendelos e dar respostas ás súas propostas, e ter presentes á hora de tomar
decisións os informes das persoas da administración que traballan con estes
colectivos.
1.9. Garantir a participación da cidadanía na
toma de decisións relevantes e no posicionamento político da candidatura sobre
temas estratéxicos e proxectos de impacto social, ambiental ou urbanístico na
cidade, distritos ou barrios, tendo en conta os principios de subsidiariedade e
solidariedade. Todas as persoas que ocupen cargos electos e de designación
comprométense a impulsar e apoiar todas as iniciativas cidadás propostas a
través do marco legal vixente ou no marco da candidatura (a escala de barrio,
distrito ou cidade). En Ferrol temos o Regulamento de
Participación Cidadá para estes fins, así que sería dótalo de contido e
desenvolvelo aínda máis para así poñer en valor instrumentos como o Consello da
Veciñanza, onde se reúnen representantes da cidadanía e dos diferentes ámbitos locais para fomentar
a toma de decicións conxuntas nos aspectos que lles poidan afectar.
2. Financiamento, transparencia e xestión dos gastos
A candidatura
comprométese a:
2.1. Ser transparente na súa xestión, publicando
desagregados todos os datos referentes aos ingresos e gastos, que xestionará en
contas de entidades de economía social e solidaria.
2.2. Pór un tope máximo ás doazóns privadas.
2.3. A renuncia explícita aos créditos bancarios
e ás doazóns de particulares que poidan coartar a independencia política da
candidatura. A candidatura terá un compromiso explícito de traballar coas
institucións da banca ética para garantir a súa independencia e a coherencia co
seu programa.
2.4. Apostar claramente por unha limitación
drástica do gasto en campaña electoral.
2.5. Fomentar o micromecenado finalista, é dicir,
o pequeno mecenado destinado a accións e necesidades concretas.
2.6. Non utilizar fundacións ou entidades xurídicas
para financiarse con recursos e mecanismos pouco transparentes, e con
obxectivos diferentes aos da candidatura.
2.7. A introdución de sancións administrativas e
penais efectivas en caso de financiamento irregular.
2.8. A candidatura fará un uso do financiamento
coherente con este código ético e os seus valores, realizando achegas puntuais
e finalistas encamiñadas a fortalecer o tecido asociativo (sen xerar
dependencias ou clientelismos).
3. Profesionalización da política, supresión de
privilexios e medidas contra a corrupción
As persoas con
cargos electos, xerenciais e de libre designación comprométense a:
3.1. Renunciar aos agasallos e privilexios que se
lles poidan ofrecer pola súa condición e que poidan significar un trato de
favor.
3.2. Non duplicar cargos nas institucións, agás
aqueles vinculados á súa condición de concelleira/a.
3.3. Non duplicar soldos nin cobrar remuneracións
extras para asistir a reunións.
3.4. Os
salarios dos cargos electos estableceranse nun futuro estatuto do cargo público
e/ou carta financeira, sempre tendo en conta os salarios medios da zona e o posto
a desenvolver dentro do concello. Enténdese que esta retribución garante unhas
condicións dignas para exercer as responsabilidades e funcións que supoñen o
cargo asumido.
3.5. Limitar o
seu mandato a dúas lexislaturas consecutivas.
3.6. Compromiso de renuncia ou cesamento de forma
inmediata de todos os cargos, ante a imputación pola xudicatura de delitos
relacionados con corrupción, prevaricación con ánimo de lucro, tráfico de
influencias, enriquecemento inxusto con recursos públicos ou privados, suborno,
malversación e apropiación de fondos públicos, ben sexa por interese propio ou
para favorecer a terceiras persoas. Así como tamén en casos de acusación
xudicial por delitos de racismo, xenofobia, violencia de xénero, homofobia ou
outros delitos contra os DD. HH. ou os dereitos das persoas traballadoras.
3.7. Facer un bo traspaso de información e de
coñecemento (sen remuneración), seguindo un protocolo acordado no marco da candidatura.
A candidatura
comprométese a:
3.8. Facilitar a conciliación entre a vida
laboral e a política, establecendo mecanismos de apoio aos cargos públicos
durante a súa reincorporación ao mundo laboral en caso de non atopar traballo.
3.9. Desenvolver mecanismos para a conciliación
entre a vida familiar e política.
Disposicións adicionais:
Disposición adicional transitoria 1. O regulamento
que regule o código ético debería incorporar mecanismos para velar pola súa
correcta implementación e especificar as canles de modificación deste, entre
outros aspectos.
Disposición adicional transitoria 2. Queda pendente
incorporar no regulamento que desenvolva o código ético o uso que se fará do
financiamento que reciba a candidatura/partido antes e
depois das eleccions. (gastos normais de funcionamento da candidatura, apoio
economico as diferentes comisions de traballo/seminarios para fomentar a
participación cidadá…)
Disposición adicional transitoria 3. As maiorias
para a aprobación/modificación do código ético estableceranse no regulamento da
asemblea.